挺險國壽

26-08-2011  am730  財經CAREFREE - 順叔

挺險國壽(上)
今期再開中國人壽(2628)，一隻應該係最少人了解，但最多人落注嘅散戶愛股。
有兩個主要「壞消息」，
第一，至6月底上半年，純利按年倒退28%，至129億元(人民幣，下同)；
第二，償付能力充足率，由去年底211%，急降至164%。
兩項「重要指標」急跌，昨日國壽股價當堂散晒，H股急跌超過一成，以一隻市值約5,000億元股票嚟講，股災都好少咁激動，唔睇新聞，仲以為國壽投資組合揩咗鑊金，又或者出現重大醜聞。
先講國壽純利條數，3月順叔曾經喺一篇「國壽社責」講過，國壽作為第一保險國企，主要政策功能係做中國第二道社會保障網，睇國壽份「社會責任報告」，可能緊要過分析佢份「財務報告」，因為拓展農村或金融服務落後地區保險市場，幫阿公促進和諧社會，未必好有肉食。
國壽舊年純利幾乎冇增長，今年中期業績更大幅倒退，好簡單咁講，都係因為保單做多咗同時，但係賠付支出亦升得更快，主業增長放緩甚至「公用化」，其實係意料中事。
不過，國壽今年頭半年，損益表上「壽險死亡和其他給付」支出，急增63%，至594億元，其實係最令人意料不到一個帳目突變。
之前講過，保險公司帳目，係所有上市公司當中，透明度最低一個類別，來自保單純利唔係講緊收入減成本後「賺幾多錢」，而係靠精算師計吓未來「唔使賠幾多錢」，國壽喺賠付同會計政策冇出現突變下，中國人平均壽命亦唔會突然短咗，死快啲。
國壽壽險支出突然急升，令業績大倒退，管理層只係擲咗一句「受諸多內外部因素的共同影響」，擺到明唔想解釋咁多，外行人亦冇可能知道最終原因。
無論如何，保險係一門分散風險生意，保險公司始終係做生意唔係開善堂，帳目幾唔透明，主要風險唔高，國壽今次壽險支出突然急升，冇可能係一個常態，否則兩、三年就會賠到破產，今次係國壽董事長袁力上任後第一份成績表，唔知會唔會係新官上任，清除「爛數」一個會計動作。
保險公司主業透明度低，但風險亦相對有限，另一項主要收入來源：投資，風險高好多，但透明度相對高好多，下回再續，睇睇國壽處理資產表現又係點，又信唔信得過。

挺險國壽(下)

上回講到，中國人壽(2628)中期業績大倒退，主要原因，在於外人冇可能明白嘅「理賠支出」，突然急升，可能係新管理層一個撇除上任「爛數」，一個非經常性會計動作；保險主業，差極有個譜，唔會年年狂蝕錢。國壽另一項「壞消息」，就係「償付能力充足比率」，忽然由211%急降至164%，急急腳要發行300億元(人民幣，下同)次級債補足資本，嚇到個個腳仔軟，但其實冇人知道驚緊乜。
首先，所謂「償付能力充足比率」，計算方程式就係將「實際資本」除以「最低資本」，聽落好簡單，但呢兩嚿數，其實要按監管要求，加上精算師逐項逐項審過度過後，一個對本身資本充足度主觀描述，複雜到冇朋友，外人亦冇可能了解。
國壽總「實際資本」1,000億元左右，相當於資產淨值50%，但係國壽本帳簿，總資產講緊1.5萬億元，兩個數差別咁大，如果真係冇錢賠，集資二、三百億元根本冇幫助，講到尾，當中有5,000億元係定期存款，現金都有近800億元。
如果閣下相信國壽作為中國第二道社會保障網，一間系統性保險國企唔會爆煲，所謂「償付能力充足比率」急降，根本冇需要擔心，最大影響，其實只係國壽係本業以外，有幾大空間，有幾多彈藥，做其他投資。
保險公司兩大搵錢途徑，第一，當然做保險，第二，就係利用龐大保金收入再投資，前者透明度極低，後者其實好易睇，一間保險公司信唔信得過，會唔會太勇，細心睇睇佢資產負債表做緊乜，多數會有一個「感覺」。
平安保險(2318)在08年信貸危機時，衝去歐洲接刀仔買貨，就係一樣好「勇」表現，國壽從來冇做過呢類動作。
如果認真睇睇國壽A股本年報，資產負債表上，逐個細項旁邊附註，或多或少，就會對國壽有一個「感覺」，舉個例，國壽有一項「債權投資計劃」，過去半年，資產增加33%至168億元，其實就係有第三方擔保下，借錢畀其他國企，或者地方政府融資平台，連中國移動(941)都話要做大耳窿，大家可以留意一吓，國壽呢嚿嘢會唔會愈發愈大。
當然，保險公司最大嚿資產，放喺證券市場，國壽持有5,679億元「可出售金融資產」，大部分係債券、股票大約1,900億元，近年國壽派成績表，市場焦點都集中喺股票投資方面，用炒作安碩A50中國(2823)思維，處理一間細水長流保險企業，其實大錯特錯。