2011年2月19日 星期六

北歐尋幽記:芬蘭後記


芬蘭前傳

我哋好少去歐洲旅行,最近果次喺N年前去嘅英國遊學團。一來歐洲旅費較貴,二來要比較多假先去倒。

今次芬蘭之旅,其實响我嘅潛意識內醞釀咗好耐 (inception???),上年有次睇明珠台旅遊節目,講挪威睇極光同住冰酒店,果吓好似撻著咗我個engine,從此一發不可收拾!!

上年八月開始計劃行程,諗過去挪威、瑞典等北歐四國,最終揀咗芬蘭,因為去過北歐嘅人話其實好玩嘅大部份集中响芬蘭,而且飛一飛去其他國家又貴好多 (唔好忘記,北歐嘅生活指數喺全世界最高!!

跟住响forum就識倒一班志同道合嘅blog友,好似 lam911, ocean 777, sy (多謝佢個北斗七星圖!), kerobe,  whng 29, tolre等等,大家都喺計劃去芬蘭,分享資料,好fruitful!!

Plan行程好似好難好煩,但對於我嚟講就喺一個好享受嘅過程,從中了解目的地嘅文化、地理環境、歷史背景等等,好有趣!! 同埋,如果個行程唔喺你plan,就會好似我老公咁,盲宗宗......

倒數果吓真喺又興奮又緊張!! 興奮喺因為去一個完全唔同嘅國度;緊張喺因為唔知幾時火山爆發幾時大雪幾時航空公司罷工.........


芬蘭後傳 (芬蘭人和事)


-- 出自我老公嘅手筆,講晒我嘅心聲出嚟!


11日嘅芬蘭和愛沙尼亞之旅除咗好玩之外,同時亦見識到呢個寧靜既白色國度,想同大家分享一吓:

1) 幾意外,芬蘭人做嘢好有效率,亦都好organized。他們行路快、揸車快、講嘢重快(可能因為每隻字都水蛇春咁長...)

2) 芬蘭人嘅英文程度並未有我想像中嘅高,尤其去到較細嘅城鎮你簡直可以放棄。e.g.當我同夫人係Kemi搵Snow Castle個入口時,有個好心人想幫我地。佢望一望張地圖,舉起隻左手話:「Turn RIGHT」,再舉起隻右手話:「then Turn LEFT」... -_- ... 不過都多謝佢咁有心。

3) 作為全球生活指數最高嘅國家之一,芬蘭樣樣嘢都好貴。想慳$$,我地決定住Hostel。由於要同人share廚房同廁所,少不免就要同人互動,亦見識不少。e.g.留兩星期但只係為咗去幫人分馴鹿既瑞士人、用疑似軍刀開罐頭嘅超大隻俄羅斯人(係咁問我係唔係"Sheena",原來問我喺唔喺CHINA,惟有話喺)、仲有連爐都未識開仲要夫人同我幫佢睇水滾既澳洲人etc.

4) 瞓冰酒店喺一個畢生難忘嘅經歷。瞓之前,職員會教你點瞓個睡袋,又話人哋-30度瞓住佢都無事,叫你放心。問題就嚟啦!-30度就無事,但喺間酒店只得-5度,咁咪超熱?!真係烏鴉口,我已經淨係著一件薄衫同睡褲訓都覺得好熱!更慘嘅喺瞓瞓吓熱到不自覺咁伸咗隻手出去,凍醒咗先發現無乜感覺,嚇到即刻室番入個睡袋度狂捽先無事!難忘係難忘,不過一次就夠啦!

5) 自少就鍾意聖誕節,可以到聖誕老人村就非常之興奮。不過,佢實在太商業化啦!左一間Souvenir,右一間Souvenir,就好似係旺角俾N間百老匯包圍既感覺...不過,「正牌」聖誕老人真喺幾OK,以下喺我地同聖誕老人嘅對話:

(排隊中,前面N個鬼佬,後面N個鬼佬...到我哋啦)


我:Hello (握手...嘩!隻手咁大嘅?!)
聖誕老人:Hello, are you from Hong Kong?
我:....yes?! (你點知架?)
聖誕老人:Nay Ho (你好) Today is the Chinese New Year!
我:...(初一你都知?)
聖誕老人:The year of rabbit!! (個樣超得戚!)
我:...yes! You are so clever! (如果我話Wrong佢會有咩反應?)
聖誕老人:Hah, Hong Kong. Seven million people!!
我:Wow!!
聖誕老人:I know everything!! (指住自己個頭,再chok多次超得戚樣!)
我:...(真係無嘢好講...)

6) 從Rovanemi再北上約4個鐘車程到達Ivalo,再坐40分鐘車到咗我地最後嘅目的地Nellim。由於已經深入北極圈,有陽光既日子特別短。聽當地人講,佢地整個十二月份都見唔到太陽!唔知係唔係因為少見太陽,呢度嘅人,尤其是個老細,特別面黑!講笑姐,不過佢面黑就喺真嘅。好在呢度個環境同埋啲活動都幾好,補番數!當然唔少得嘅喺響果度認識嘅其他遊客,因為佢地都好nice!

7) Nellim真喺幾凍,我哋留左4日,平均都係-25度。係咁嘅溫度下,四個鐘嘅Husky雪橇就顯得有啲長,啲風打落塊面度都幾痛下。完咗之後,我發現有幾樣野都結咗冰:我包濕紙巾、袋裡面樽水、同埋我老婆! (hi! 講我呀....)

8) 响Nelim三晚有兩晚都見到極光真係好好彩!喺現場睇同睇相嘅分別,就好似現場同電視睇賀年煙花果種分別。(當然無聲同火藥味啦!) 感覺好偉大、好寧靜、又好靚!唔係賣廣告,不過我真喺覺得成世人都應該只少睇一次! (下次Alaska呀唔該)

沒有留言:

張貼留言