2012年7月31日 星期二

閒遊墾丁 - 預備篇

即將放大假,無預備去旅行,諗住天氣噉熱,去邊都死...响屋企唞吓仲好...

點知,老公突然話請倒大假陪我,嘩!唔去旅行咪好嘥!

時間噉倉促,都知未必訂倒機票.... 所以target啲近嘅地方。

台北去過,可以去吓曼谷、沙巴要長啲時間.... 我哋得三四日....

突然,腦海出現『海角七號』.....



不如去墾丁囉!

上網睇咗啲資料,對墾丁有個初步嘅認識,果個地方喺無直航機去嘅,要响高雄轉機。

 跟住就立刻打電話問機票,打咗學聯、新華、東瀛遊問自遊行package,所有都不約而同話機位好緊,去程上晝得番幾個位,唔喺就要下晝;回程想禮拜日番香港簡直喺無可能!另外,就算有機位,酒店大部份已經full晒,同埋,因為within一個禮拜內起程,全部都要先「磅水」,仲要喺full payment先同你check房。

搵咗成日,最終好多間酒店都無房,同埋好貴 (4日3夜 $5400一個人!貴過去韓國!)。Package好多都唔包民宿,就算包果啲又full晒.....  東瀛遊仲好笑,話俾咗錢一個禮拜後先答倒我有無位。吓?我下個禮拜要飛囉喎!.....

總之,就極沮喪....

從來未試過咁倉促去旅行....  芬蘭果次喺半年前開始plan嫁...

就响我諗住放棄唔去之際,我問自己:「點解要join package?唔join唔得咩?」

Join package喺因為通常會平啲.... 但宜家都噉貴咯!

一於試吓全部嘢分開上網訂:機票check港龍、華信;酒店民宿check Hotel.com、Agoda....

機位時間同旅行社check的一樣,跟住我試吓用唔同日子唔同組合check,最終搵倒港龍早上8點去程、晚上9點回程,玩3日2夜,避開啲旺嘅日子,,兩人HK$4,806。

之後就搵酒店民宿,唔靚嘅酒店都好貴,要成千蚊一晚,激死人!

Tripadvisor唔錯,有好多民宿揀 (新華直程唔做民宿!)

可以揀嘅唔多,較出名的都無位....

最後揀咗兩間comment唔錯的.... 都唔可以連續兩日住,一日一間....

都好,可以試多啲,新鮮啲....

一間個名好得意,叫『二手童話』,連稅HK$852一晚

二手童話

一間普通啲,叫『墾丁海逸渡假旅店』,連稅HK$665一晚

墾丁海逸渡假旅店

用信用卡online俾錢就搞掂,print張hotel voucher攞房就得,超方便!

最終,一個人都喺HK$3,162,三日兩夜,算OK啦!

除咗去墾丁,回程9點幾機,果日仲可以去埋高雄市逛逛!


MISSION COMPLETED!!

Useful links:

酒店民宿評分及訂位: www.tripadvisor.com.tw
酒店民宿評分及訂位: www.agoda.com.tw
港龍航空: www.dragonair.com
中華航空:www.china-airlines.com
二手童話官網:http://www.ktfun.idv.tw/
海逸渡假旅店:http://www.hiyi.idv.tw/ 
HOT墾丁:http://www.hotkt.com/
墾丁哈特佛租車行:http://www.kthartford.com.tw/
墾丁快線(高雄往墾丁客運):http://www.taiwantrip.com.tw/Besttour/Info/?id=14
墾丁地圖:http://www.uukt.idv.tw/_tw/map/street_01.php


10 則留言:

  1. Have a nice trip!! ^^
    記得帶手信比我 (即係影多的靚相番黎分享) ^3^
    謝謝!! d*v*b
    一路順風~~ ~~ :)

    回覆刪除
  2. 玩開心D, 返來介紹下邊度最好玩, 同埋邊度有好野食。

    回覆刪除
    回覆
    1. 一定一定,宜家求神拜佛唔好打風,睛天公仔要出嚟幫手...
      台北沖繩都就嚟打風!
      不過呢啲嘢時也命也...要打都無辦法...

      刪除
    2. 剛睇新聞, 見到台灣馬英九已預備坐鎮風暴指揮中心, 睇黎呢個風會好勁, 希望快來快去啦, 唯有當自己係貴人 -- 出路招風雨, 之後雨過天青!! ^^

      刪除
    3. 望喺噉望...有兩個同事今明兩日飛台北,睇嚟凶多吉少...

      刪除
    4. 吓... 今晚兩日飛台北... =_=" 唯有用另類思維, 遊覽風暴過後或惡劣天氣下的景觀, 感受一下遊覽地方在不同天氣的變化, 呢種全新體驗, 簡直係正能量的極致發揮呀!! ^^

      刪除
    5. 其實我都唔好得去邊,天文台話去旅行果幾日都落兩...:(

      刪除
    6. 突然間想起, 其實去邊度旅行, 天氣好吾好等等, 可能未必係心情好吾好的決定性因素, 如果可同最愛的人能夠同一時間忙裏偷閒, 在某特定時間和地方享受二人世界的生活, 那種感覺會如何呢?

      千萬不要誤會我在說教, 剛巧看完妹妹您的留言, 我腦內突然回憶起Leslie在阿飛正傳的對白, 亦響起Aaron Kwok 的經典名曲 -- 「雨中感嘆號」... 哈哈!! ^^

      刪除
    7. Vagabond兄,你說得對。
      可以一齊旅行已經很好:)

      刪除