2012年3月30日 星期五

羊兒哀歌

30-03-2012  (陸羽仁) 頭條日報


美國最近一周首次申領失業救濟人數減少5000人至35.9萬人,創了20084月中以來最低。事實上,美國勞工處剛修改了計算方法,如果用原來的公式,首次申領失業救濟人數其實只有不足32萬人。相比2009年年初,首次申領失業救濟人數高達65萬人,從任何角度睇,就業市場已經有非常大的改善。

但投資者只將實際數字比較市場預期,市場預期為35萬人,實際係35.9萬,好消息就變成壞消息,拖累美股一度跳水,而全球股市見紅,特別係歐洲股市平均下挫1.3%,亦係打擊美股投資情緒的一大原因。歐洲第四大經濟體西班牙,日前表示完成唔到將赤字佔GDP比倒控制在4.4%的目標,只能做到5.8%,她明天將提出緊縮財政的預算方案,全國出現大罷工。有傳媒報導西班牙已向歐盟與國際貨幣基金組織(IMF)尋求救援基金,以加速該國銀行業體系的重組,西班牙隨即澄清話沒有此事,引起了市場對歐洲危機重燃的焦慮。

另外,評級機構標準普爾繼續不忘「跟進」希臘情況,話希臘可能不得不再次進行債務重組,一旦發生,將涉曾經救助他的夥伴,包括歐洲各國的政府,歐洲情緒一度影響美股,杜指朝早最跌過94點,但接近13000點已支持,掉頭向上,收市仲倒升19點,收13145點。標普500指數更一度失守1400點關口,觸及20天線1392點亦見支強力支持,收市微挫,但仍能收於1400點之上,報1403點,微跌2點。

近期好多民企都暴跌,即使是中小型國企回2030%比比皆是,揸正呢啲股票的朋友大叫救命,網友大笨袋鼠有此回應: 短期炒賣,正路定10%止蝕,套回現金就可以重長計議,再戰江湖。可是錯過止蝕,跟住越蝕越多,可以蝕到十分迷茫。好多時聽打電話問股票,都係輸到咁上下,表面係問意見,其實係迷茫到要搵人認同、或代作決定。」

佢話:「老實講,就算唔係輸錢嘅人問股票,有時被問嘅人都好難俾答案,雖然好多詢問者都係有股品的,知要自己最終負責,但被問嘅人唔一定知,又或者有第三者旁聽,撞著個無品嘅,是但隻股跌個七彩或升到跟嫦娥上月球,都好易俾人媽媽聲問候。一般而論,袋鼠會覺得,當股票輸錢而又沒有10%止蝕,如果事前又無計劃、無心理準備,就會對手頭上的投機決定已經難以理性地分析 - 亦即是之前一段所講的迷妄。有時引刀成一快,套回現金養傷,反彈回升或再跌到PK都唔關你事,但這樣起碼可以俾機會自己退出局外,更多反思空間。」

佢繼續話:「唔記得那一位常註網友,提過在衍生工具輸錢時輸得好甘,但超過了10%好多好多都平了個盤,當晚抽離了市場,意外地不是念念不忘輸錢,而是特別好瞓。袋鼠都有類似經驗。」

我睇見袋鼠咁講,都好有感慨,既覺答問題之難,亦明散戶之苦。散戶是隨波逐流的羊群,在大市好景,熱火朝天時,最易搵食,因為佢地跟住趕羊人到處行,遍野青草,食之不盡。即使趕羊人其實係狼扮的,即使趕羊人帶佢地去到屠房後院的草地開餐,佢地都會食到好開心。假設旁邊有個先知,睇咗呢個故事二三十年,知道次次結局都係一樣,佢都好難出聲,因為羊兒食草食得好高興時,佢地根本無問題想問,你走埋去多多意見,話在這裏食草好危險,在那裏食草有陷阱,佢會話你多事,叫你死開。你堅持講嘢,佢天天有草食,就會覺得你講嘢錯,佢食草先至啱。

以超級靚數上市的民企,我假設十間之中,有一半真,一半有假嘢,但世事無絕對,以假數上市的民企,若老闆夠醒,將集到的錢正正經經放在生意上,買機器擴產,不能排除佢能弄假成真。倒轉來講,以真數上市的民企,本來老老實實做生意,上咗市後,銀行信心增加,以前要按嘢先至借錢俾佢,而家唔使抵押可以借。另外好多古惑仔亦會走埋來,教民企老闆搵「便宜資金」炒作,從此走上歸路,而家咁多民企唔掂,當中不少是把錢拿去炒股炒樓被套牢。講番上市之初,好壞難辨,若叫你唔買,佢日日升,我就實行俾人掟爛蕃茄,叫我唔好扮先知。所以我多數選擇唔講,只是見到炒到太離譜的公司,先至講兩句,講完就算,這是開場的情況。

將部影碟機按一個快速飛前掣,個故事飛到中後部,羊兒食草食得好高興後,被趕入羊圈,羊兒半推半就,都覺得有少少唔妥,但大部份都入閘,說時遲那時快羊圈的欄柵關上,趕羊人把羊兒的羊腳縛住,羊兒開始覺得唔對路,開始向先知問問題,但事到如今,答案千篇一律,叫羊兒自己咬斷自己隻腳逃生,好似太殘忍,叫羊兒死等等奇績出現,機會又可能不大,所以「那些年」羊兒沒有興趣問問題時,其實先知有好多東西可以講,到近結局羊兒有興趣問問題時,又無乜好建議,有點無奈。

所以我叫大家分開「投資的我」和「投機的我」,對一啲摸唔清睇唔透的青綠草原,用投機心態,去食吓草唔拘,但一有少少風吹草動就閃,咁就唔會傷身。要長線投資,要對那樣東西十分理解,即係你見到的草地即使唔係好多草,但都夠食,週圍環境清清楚楚,就可以長期定居,係無咁正啦,勝在安全啲囉。

沒有留言:

張貼留言