歷史喺會重複的...

羊兒哀歌 (3)

11-04-2012  頭條日報 (陸羽仁)

美股終於出現今年最差的跌市，杜指跌213點，收12715點，跌幅1．7﹪。話佢最差因為今年其他跌市美股都係在開市頭一個鐘見底，並會在收市前反彈，特別會在歐洲收市後反彈，但昨日彈都唔彈，而且成交好大，紐交所成交9．7億股，平日通常成交只有7至8億股，跌市成交大，顯示市場信心開始動搖。

跌市的觸發點在歐洲，西班牙話佢守唔到削赤要求，令歐洲股市大跌，意大利股市跌5﹪，法國股市跌3﹪，德國和英國股市跌多過2﹪。意大利和西班牙的債息急升， 歐洲危機又有重臨的感覺。

過去一段時間，美股一直脫離歐洲的走勢，昨天跟番歐洲走，唔係好預兆，過去一直在等 QE3，怕只怕未等到月底聯儲局決定有無QE3， 美股已經插咗落去。

今日想再講講早前寫的「羊兒哀歌」續集。前一陣子網友myself(直升烏蠅)有一個好長的回應，我想引用一下。佢話：「 陸sir寫『羊兒哀歌』，用羊比喻小散户真係好貼切，小弟亦有親身經歷。大家都知羊係膽小既動物，大跌市時人心惶惶，眼見身邊人都輸緊錢，報紙所見都係負面新聞，悲觀情勢主導，而散户反而唔敢買貨，唔買就唔輸。往往要到大升市，身邊親友都賺到錢，報紙頭條都唱好，特別係越接近升市尾段，細價股日日爆升十幾%，散仔受火熱既氣氛吸引而入市，上升中既股市容易繼續上升，散仔初段盲目買股多有錢賺，羊的錢本來只係放銀行收息食下草，一旦買股賺過容易錢食過肉就以為自己係一隻狼，哈哈，成群老散歡天喜地之時，散户就越買越安心，股票越買越多。到股市見頂回跌初段，一般仍然係利好消息主導，散户一般開始� 斿X唔止蝕，甚至溝淡，但指數已無力再上拾級而下，散户錢越套越深，到輸超過一半時已經放棄跟進，派對過後留下滿倉跌了七、八既蟹貨，炒埋唔夠一碟，是為『羊兒哀歌』。

Myself繼續講：「輸錢皆因嬴錢起，升浪殺人，小弟所見，無數個小升浪每次殺一小群羊都唔好講，大升浪宰羊就更明顯。近十幾年既大浪分別係97年炒回歸、00年炒科網股、07年炒國內資金自由行，每次大升市既概念不同，但每次都有一大群羊被屠宰。97年小弟亦係被殺既一群，其時第一次買股，國企紅籌炒回歸注資，大中細股炒到瘨，恆指直上17000點，其時小弟剛畢業，見阿媽炒股賺到錢，『阿邊個個仔買咩咩賺左30%！』，『阿邊個炒股個個月賺十萬！』，『阿邊個全職炒股個個月執十幾個！』，自己入左間証劵行做，見間証劵行日日逼到爆，又真係好多客炒炒下有錢賺，於是就靠自己少少積蓄，加阿媽打本5萬開始下海買股票，記得個時真係全副薪家一次買哂，買左六、七隻二、三線股，仲同人講，要學巴菲特分散投資，所以買左六、七隻二、三線股，又航運又航空又陸地，真係好『分散』，自己對所買股票毫無認識，只知股升有人買，自己又跟住買，初期真係隻隻都升，巴菲特話要長線投資，所以升都唔放，個時心諗：『開間廠咁辛苦一年都係賺十幾%，我買股揸一個月唔到已經升廿個%，買股至富呢條路係掂架！』，之後亞洲金融風暴，上映外資大鱷夾息沽期指，再借現貨沽，恆指直插8千點，小弟的『長線投資』，一早已經打哂柴，睇都費時睇，呢隻跌到得返幾千，個隻得返幾百，是為『羊兒哀歌』。」

佢再將故仔寫落去：「其後二千年，科技股大熱，楷哥日日上頭板，小弟推銷基金，個時既基金有『科技』兩個字特別易sell（賣），行過証劵行又遇見當日逼爆市面，見過鬼怕黑，心知歷史又要重演，所以高位唔買冇輸錢，但最後都忍唔到買左電盈，個時心諗，佢係龍頭股，前身係香港電訊，再加上由高位三十幾跌到八蚊（高位應該係２８元），開始買貨，越跌越溝，結果跌到得返個幾，三十跌個幾係輸九成，八蚊跌到個幾又輸九成，真係30樓跳樓跌死人，八樓跳落來一樣係跌死人，視為『羊兒哀歌』。」

佢最後講：「時間來到07年，小弟入左間大公司，前後左右好多同事仔都炒股，其時炒內地資金自由行，短短兩三個月，恆指由二萬五直沖三萬二，牛氣沖天，係公司經常可以聽到同事講股，好多係自己從未聽過的number（號碼），仲幾個同事，每人夾兩三千去炒邊消息股，你話係咪好散，不時『阿邊炒股賺左萬幾蚊請食tea』，『阿邊個放左隻IPO又請tea』，似曾相識既感覺，之後雷曼爆煲金融海肅，身邊同事都好幾年冇再講股，雖然唔知佢地高位有冇走到，恐怕都好難，因為賺緊錢唔會走，輸左錢更唔會止蝕，恐怕都係賺既輸返哂，是為『羊兒哀歌』。」

你睇Myself佢不斷重覆「羊兒哀歌」四隻字，從文裏行間都見到一股怒氣，首先我希望Myself化悲憤為實力，畢竟呢啲血的教訓，係自己用錢買回來，十分珍貴，應該記取。

你睇Myself自述的經歷，佢已經係一個比較懂得學習的人，想避開羊兒的命運。佢在97一浪做最多散戶做的事情，「買左六、七隻二、三線股」，二三線股升跌好快，在97年那種大牛市，升市時最易賺錢當然唔係買藍籌，係炒輪或者買二三線股。但好多二三線股幕後有莊家，而且愈會升那隻愈有莊，這是一個莊家和散戶對賭遊戲，莊家把一隻廢股炒高10倍，借住個市熱將兩三成貨暗中放出街，佢都回本兼有對開賺，莊家睇住散戶底牌來炒，散戶長賭必輸，呢個教訓表面睇好易學，但過得一兩年，個市旺番，散戶見到啲股日日升，好易又迷番落去。

Myself好似無回頭炒二三線，已經好叻。順道講佢當時買二三線所謂分散投資，佢話「仲同人講，要學巴菲特分散投資，所以買左六、七隻二、三線股，又航運又航空又陸地，真係好『分散』」。我扮巴菲特答，你買六、七貴嘢，無論幾分散，都係貴嘢。

到2000年，Myself無炒二三線，無陪人顛，但最後買咗隻電盈，高位28元無買，跌到8蚊開始買貨，越跌越溝，結果跌到得返個幾，「真係30樓跳樓跌死人，八樓跳落來一樣係跌死人」。Myself你唔好彩，若果你再2000年識得我，你問我好唔好8元買電盈，我會叫你咪買(我當時叫過幾個朋友唔好買)，原因又係一樣:貴。

你會問由28元跌到8元，已經平咗好多，點解仲係貴。關鍵係楷哥用自己間盈科買香港電訊的性質。楷哥大玩財技，盈科投得數碼港，市值炒上3000億，當時已盛傳電訊賣盤，電盈市值亦炒上3000億，然後盈科係以合併電訊的方式買盤，電訊股東唔喜歡可以攞錢走，電訊大股東英國大東電報局就係咁攞現金走咗，記住合併式收購係由合併後的新公司支付收購，財技一玩，即係用電訊的現金俾大東攞走咗，新公司負上巨債，大東套現，新公司股東還債。所以電訊由28元跌到8元，市值仲有近1000億，負債咁大，最賺錢的國際電話市場又開放，電盈點值咁貴? 正常公司10幾倍PE，即係電盈要賺70、80億一年，點賺? 所以Myself當日由8樓跌落來，主要亦係分不出電盈的股價平貴。

要分股票平貴，難免要估佢未來5年、10年盈利，公司愈細愈難估，本來電盈這類大公司較易股，但佢當時涉及無人識估的互聯網業務，加上打破壟斷，所以亦唔易沽，但大路去沽係唔會好。

羊仔要避開危險，首先唔好去綠草如茵的天堂，因為上天無對我地咁好，若買股天天賺錢，仲有人番工。所以大股又好，細股又好，若然狂升，避之則吉。狂升股跌緊落來，也不要去接劍，記住8樓跳樓的教訓。唔識揀股，可去買指數基金，等佢回落得咁上下，PE較低時買，即使買錯，買完即跌，揸一年半載可以到岸，過程中仲收埋息，以此為基礎，然之後先至練工夫睇個別股票，無咁上下功力，想急都急不來。