兩個轆遊墾丁 (DAY2)：人生的第一次

DAY 2：後壁湖、恆春鎮

2012年8月10日(五) 下大雨，約26度

早餐事件簿

約9:30AM，我哋過去『牧場旅棧』大堂食早餐

因為喺民宿，用膳地方好細，只有約10個位

去到老闆娘招呼我哋坐响一對香港夫婦側邊

正當我哋想坐低，佢哋就同我哋講果兩個位有人，繼而招手叫兩個細路過去

噉你哋頭先又唔同老闆娘講個位有人？

可能佢哋國語唔流利卦... Never mind... 

不過，大堂果吓就無位囉，老闆娘都好唔好意思，叫我哋遲10分鐘再嚟

唔緊要啦，暑假旺季嘛....

之後我哋番去已經有空位，

早餐好簡單，喺蛋番茄生菜三文治，可以揀飲鮮奶、咖啡或茶

話喺牛初乳唔知真唔真，不過真喺好香濃！正！

枱邊嘅可愛牛

之前果家香港人仲响度，佢哋應該有兩家人

問題喺，到我哋食完佢哋仲未走....

大人响度嘆報紙雜誌傾偈、細路就响度玩game....

8個人霸咗差不多成個大堂

唔喺話你哋唔可以坐响度，但今日啲位咁緊張，你哋要玩要嘆，可以返房嘛....

唔該你哋為吓人哋著想啦...

仲有，果家人講嘢間中夾雜住英文，教育水平唔低㗎喎！

有啲香港人真喺好自私...

我覺得香港人識話強國同志無禮貌自私...

但正正就不知不覺學咗...

無蝕底嘛！

食飽我哋出去影吓相...

隔離嘅民宿『愛情海』

人生嘅第一次

出面仲喺不停落雨....

想繼續踩單車，但落雨成身濕晒好易病，著住雨褸踩又會焗死...

唔... 都喺去咗租車行睇吓點先...

雨越落越大...

我哋今日計劃去西南面嘅後壁湖，同遠啲嘅恆春鎮

車行老闆話一日去晒兩個地方都幾遠，叫我哋考慮吓租『電動車』

吓，我哋未揸過喎...

電動車好似綿羊仔噉，但用電、慢啲同唔駛有機車牌

好似幾好玩，但又有啲驚....

老闆話識踩單車就平衡倒，唔難...

噉，不如試吓囉

老闆都好負責任，叫我哋試吓先，睇吓揸唔揸得掂先

跟住佢帶咗我哋過對面公園試駕

開頭揸，一加油就失控向前沖，轉彎就失平衡，救命！

試咗兩個圈後漸入佳境

我同老公都好想玩，就一人租一架，兩架盛惠NT$1,100半日

電動車：外表同綿羊仔差唔多

我哋人生嘅第一次！

冒險王！

著埋雨褸好論盡....

老闆建議我哋先响無咁多大車嘅東南面(尋日踩單車嘅路線)習慣吓先

開頭揸反應較慢，都好驚失控撞埋其他車果度，

老公帶頭，我跟住佢無咁驚...

揸咗15分鐘就開始啲有信心

因為電池嘅原故，電動車唔可以行得太遠

我哋去後壁湖之前，要先番車行換電 (喺免費嘅)

(P.S.：電動車時速約40km/h，揸揸吓嫌佢慢添...不過，都喺安全緊要)

墾丁大街往後壁湖路線圖，來回共14.2公里

西南面果然多好多旅遊巴

揸緊嘅時候仲要落好大好大雨，

雨點不停打落塊面同對眼，搞到對眼好喼...

不過真喺幾好玩

中途有「機車路」，車路同機車路中間有小樹隔開，感覺安全啲

有啲「機車路」就响公路邊間條線

但都有危險位，有啲車超車時會霸埋條「機車路」好貼近我哋，
我哋唯有盡量貼近路邊行駛...

約45分鐘後，我哋就到咗後壁湖

我哋唔喺嚟睇風景，喺特登嚟食嘢㗎！

後壁湖『輝哥生魚片』

生魚片即喺魚生，嚟墾丁嘅遊客個個都會响度食

你問呢度嘅人，佢哋個個都識！

『輝哥生魚片』响一個魚市場入面，其他舖都喺食魚生

但只有佢... 超多人...

觀察所得，店舖喺以家庭式經營

叫號帶位嘅喺細佬、老闆就跟頭跟尾、阿妹同阿媽就起菜、阿哥同其他人負責廚房

細佬把聲超大，叫號嘅時候成個市場都聽倒，勁！

好彩，我哋1:30PM到，之前果輪剛食完，我哋等約15分鐘就有位

你估吓呢碟魚生幾多錢？

40片生魚片，片片都厚厚的！！

答案喺：NT$200 (~HK$50)！超級平！

口感真喺一流，但有啲唔喺好新鮮

不過HK$50噉大碟，就超抵食！

碟碟都好大碟，食到捧住個肚，仲要啲魚生食唔晒，好浪費...

埋單NT$1,100，約HK$300

食飽周圍行吓...

旁邊嘅碼頭

之後揸返車行換電，再去恆春鎮

今日全天落雨....

墾丁大街往恆春路線圖，來回共20.8公里

恆春阿嘉之家

因為「海角七號」這套戲嘅原故，墾丁、恆春等地因此而出名

見雨停就位刻影相

呢間就喺主角阿嘉嘅屋企，入內參觀要俾錢，無咩特別我哋無入去

主角阿嘉返工嘅郵局

終於見倒真嘅牛，佢哋好嘆...

自己覺得，恆春其實無咩特別....

之後用咗一個鐘多啲揸番墾丁

返到去差不多5點

好彩租電動車，否則行唔晒成個行程！


揸電動車真喺好刺激！好好玩！

中途俾一架大車駛過淺出嘅污水噴到成面都喺

諗起都想嘔
不過，原來超愛乾淨嘅我，有得玩喺唔會介意

墾丁海逸渡假旅店

因為『二手童話』今日無房，我哋轉嚟『墾丁海逸渡假旅店』

一晚HK$665，平日應該仲平

其實呢間民宿仲大過『二手童話』，

房間設備齊全，連牙膏牙刷風筒都有，好似酒店一樣，

不過就無咁有特色囉....


我哋又濕又攰，一於响民宿沖涼洗頭唞一唞....

約7點，我哋又出發掃街！

熱狗腸，好耐未食過，下面喺起司味，上面喺原味

雞排：較乾，無台北士林夜市豪大大雞排咁好食

台灣啲告示好搞笑...

不同口味嘅燒干貝  

燒干貝店

台灣人好鐘意嘅QQ蛋奶， 其實即喺香港嘅珍珠奶茶，
不過有好多味，我就覺得無咩特別

山豬肉、香腸

~End of Day 2~

Continue...Day 3：太陽出來了！

如需有用資料，請往『閒遊墾丁-預備篇』

兩個轆遊墾丁 (DAY1)：風雨不改

DAY 1 ：墾丁東南部 (船帆石、砂島、鵝鑾鼻)、墾丁大街

2012年8月9日(四) 下雨，約26度

香港往高雄

6:30AM往櫃台check-in，地勤話機位好滿.... 

砌左好耐先俾倒孖位我哋，仲有，多左張ticket......

我哋第一次坐緊急通道位！噉啫喺咩位？！

吓？！坐緊急通道？！

唔喺啩....

地勤仲話，如果有咩意外，坐呢個位嘅有義務幫手疏散乘客.....

8:45AM登機，我腦裡面充滿疑問.... 陣間個位喺咩樣.....

上到飛機就知咩事嘞....

Airbus A321

原來喺細機，打橫得6個位，每邊3個....

(註：之後查番，A321可載186-206個乘客....

平時大部份時間都喺坐A330，可載300個乘客)

www.airbus.com

仲無電視睇添....

我哋個位...

緊急逃生時，我哋要負責拆咗隻門....

坐抵無耐，就有個空姐叫我哋睇熟門上嘅指示....

攪到我好緊張.... 好似好危險噉...  好似隨時會有空難發生....

好彩，約1個鐘嘅航程好快過....

高雄往墾丁

9:30AM，我哋到達高雄小港機場 (墾丁喺無機場嘅)

原本打算坐捷運去高雄市(左營站)轉客運『墾丁快線』，

車程約兩個半小時，連捷運每人約NT$375

中途有的士兜生意，同另外一對香港人一齊坐，個半鐘到，每人NT$400....

諗吓諗吓，都喺上的士啦... 又落緊雨，轉嚟轉去好麻煩㗎....

的士都幾舒服，喺Toyota嘅Wish

但喺，台灣人手車真喺又辣又狼，

司機鄭師傅逄車過車，brake都唔多踩....

仲有，一路踩公路100km/h，一路不停單手接電話接order....

一接嘅時候，架車就0朗一0朗，好嚇人....

所以我都唔敢瞓覺....

坐的士途中經過嘅雲海

不過，就真喺好快到...

墾丁民宿：二手童話

去到約中午12點，鄭師傅送我哋到民宿門口

墾丁都喺落雨...

我哋第一晚住『二手童話』

原來喺响『牧場旅棧』道check-in

房間應該喺2點後先可以check-in，不過我哋都試吓得唔得喇 

老闆娘話房間未收拾好，叫我哋出去大街逛吓先

我哋就搵咗間嘢食午餐

間嘢叫「南台灣」味道麻麻地，唔多介紹喇...

好似食兒童餐噉... 

飯後逛逛大街，嚟到『鍾小勤』

飯後甜點：富士山雪糕，我哋揀咗紅豆同花生味
超正！尤其是花生味，超香濃，之後我哋日日都食一支 (肥死喇 ！)

1:45PM我哋番民宿

牧場旅棧好有特色，我不停影相！

周圍都喺牛...

思考牛

牛生牛太

牛生同牛太咬耳仔

之後老闆娘帶我哋去隔離嘅『二手童話』

雖然落雨，見倒民宿咁可愛，心情靚番晒！一晚HK$852

好靚哦！！

門外告示板

好浪漫哦！

入門口右邊嘅洗手盆

左手邊喺廁所同浴室

民宿自製嘅，好可愛，看圖識字

浴室裝飾，好舒服哦

呢間房嘅主題喺『愛情公路』

Marry me!

個corner有部Hi-Fi播啲好relax嘅音樂

裝修好natural

兒童不宜

酒樽做嘅牆壁裝飾

出面有個洋台，可以瞓响度睇景

播住好relax嘅音樂，我哋不知不覺就瞓著咗囉

設計好靚嘅葉形枱燈

走廊嘅裝飾：熊腳印

後門

電話亭

恆春半島地圖

醒過來已經差不多3點...

下午陣雨減少，我哋照原定計劃踩單車，遊墾丁東南部

我哋响墾丁大街附近嘅『哈佛特租車行』租咗兩部單車，

半日NT$600，佢哋啲車都OK新淨

Day 1 嘅單車行程路線圖，來回共15.4公里

船帆石

船帆石

單車行程，風雨不改

中途都有落微雨，但都喺一陣

另外，因為無單車徑，所以喺踩車路，同啲大車、旅遊巴一齊....

開頭都有啲驚... 大車鏟過fung fung聲，後來都習慣咗

砂島

由墾丁大街踩到砂島，大約一個鐘

水好清，如果天朗氣清，水會喺天藍色

鵝鑾鼻

鵝鑾鼻燈塔，又喺，天氣好的話好靚嫁... 入場費NT$20一人

回程無停景點，一次過踩番去，用咗約1小時15分

中途遇倒「輔仁大學』環島單車隊，佢哋有車幫手開路，

我哋都有段時間痴住佢哋踩，安全啲嘛

墾丁大街夜市

6:30PM回到大街，超級肚餓.... 

路邊嘅夜市開得七七八八咯....

雖然全身臭崩崩，我哋忍唔住立刻開餐，

開始掃街

好飲嘅椰青

起司棒

超正嘅燒石蠔，一打都喺NT$200，yummy!!!

部分檔有得坐

燒雞，正！

炸鮮奶，無乜特別

民宿附近嘅酒吧，好有FEEL

~ End of Day 1~

Continue... Day 2：人生的第一次

如需有用資料，請往『閒遊墾丁-預備篇』